من أوائل المواد اللي أغلبنا درسها واتعلمها في الكلية واللي كان بيتم تنبيهنا ليها لمدى أهميتها هي الـ Data Structures.
انهاردة هنتكلم عن بعض استخدامات الـ Data Structures في الحياة العملية والغرض من ده هو اننا نمرن العقل على استحضارها في تصميم الحلول البرمجية والمشاريع مش بس في حل المسائل والتمارين.
ولو انت عاوز توصل لأقصى استفادة ممكنة، خليك حريص دايمًا على أنك تسأل نفسك .. ليه انا استعملت النوع ده من الـ DS ؟ وايه هي مميزاته عن الأنواع التانية ؟ وهل هو مناسب لطبيعة متطلبات المشروع ولا لا ؟
Lists & Arrays
هم من أكتر أنواع الـ DS شيوعًا واستعمالًا وغالبًا ما هتعتمد عليهم في شغلك بشكل كبير .. ومن اشهر استعمالات الـ 2D Arrays :
الـ Image Processing :
فمن خلال ان الصور بيتم تخزينها في شكل 2D Array of Pixels ده بدأ يسهل من عمليات الـ Image Processing ان يتم التعامل معاها رياضيًا من خلال مثلا اضافة Filters معينة وعمل عمليات عليها ..
ومن الاستخدامات التانية للـ Lists على سبيل المثال
- حفظ جهات الاتصال على الـ Mobile
- استعمالها في الـ Games عشان الـ Ranking لأفضل اللاعبين والـ Scores
Stacks
من الـ DS المهمة جدًا وبتعتمد في طريقة الوصول للـ Data على الـ Last In First Out – LIFO .. وتقدروا تتخيلوها كشوية حاجات محطوطين فوق بعضهم .. واللي ناس كتير بتغفل أهميتها لإنهم بنسبة كبيرة مش بيتعرضوا ليها في شغلهم بشكل دوري.
من استعمالات الـ Stacks خاصية الـ Undo – Redo:
والي كتير من البرامج حاليا مبقاش في غنى عنها .. فالأوامر اللي انت بتنفذها بتترتب في Stack ولو حبيت تعمل Undo بتشيل آخر أمر نفذته من الـ Stack ولو حابب تعمل Redo بترجعه للـ Stack.
Queues
من الـ DS المهمة واللي من اسمها فهي بتعامل الـ Data كطابور اللي جه الأول هو اللي هيطلع الأول .. وبتنافس الـ Stack في طريقة الوصول للـ Data من خلال الـ First In First Out – FIFO.
من استعمالات الـ Queues
- خاصية الـ Notifications : أغلب التطبيقات بيهتم بأنه يبعتلك الاشعارات اللي بتجيلك على حسب ترتيبها فالاشعار اللي بيجيلك الأول بيتبعتلك الأول.
- خاصية الـ Waiting List: بحيث انه لو فضي مكان زي (حاجة عاوز تشتريها خلصانة، أو حجز لتذاكر معينة) تقدر توفر مكان لحد من اللي موجودين في الـ Waiting List على حسب ترتيبهم باللي جه بالدور.
