كلنا سمعنا عن الـ Agile وممكن نكون درسناه في الكلية أو حتى شوفنا ميمز عنه، بس ليه مهم و ليه بنستخدمه؟
الـAgile Approach هي طريقة في الشغل على المشاريع بتتبع مبادئ معينة، معني الكلمة الحرفي هو “التحرك بسرعة ومرونة” ودا فعلًا الهدف الرئيسي منه!
ايه هي طرق تنفيذ المشاريع؟
لما بيطلب منك أي مشروع، في طريقتين لتنفيذه:
الطريقة الأولى
تاخد المواصفات اللي العميل محتاجها وتصمم وتنفذ وبعدين تسلم.
المشكلة فين؟
الطريقة دي مشكلتها إن العميل بيكون متخيل حاجة وبنسبة كبيرة مش بيلاقيها وقت التسليم.
ايه هو سبب المشكلة؟
يمكن لأنه مشرحش الفكرة ليك كويس أو إن تخيله عن مشروعه تطور مع الوقت وأنت طبعًا كنت صممت وبتنفذ أو حتى خلصت ومش هتعيد من الأول.. فالنتيجة هو مشروع مش متناسب مع المطلوب، ودي بالمناسبة اسمها Waterfall Model لأنها بتمشي في إتجاه واحد زي الشلال.
الطريقة الثانية
طريقة الـAgile بتحل المشكلة الكبيرة دي بإنها بتجزئ المشروع وتسليمه على أكثر من مرة، وتاخد رأي العميل على كل جزء ولو حابب يغير حاجة، بل لكل جزء بنشتغل عليه بنعمل دورة إنتاج كاملة:
- بناخد المواصفات من العميل
- نصمم المطلوب
- ننفذ
- نسلم الجزء ده ونعمله Deploy
مميزات الـ Agile
- المرونة لسهولة التكيف مع التعديلات في المواصفات المطلوب إنها تتنفذ
- رضا العملاء والشفافية وسرعة التسليم لإنهم بيشاركوا في كل جزء ويشوفوا تسليمات دورية لطلباتهم
- جودة التواصل لأن مبادئ الطريقة بتشجع على التواصل المستمر في اجتماعات مختلفة زي الـStandups و الـKnowledge share و الـRetrospectives
ولكن برضوا لها تحدياتها اللي محتاج تاخد بالك منها وأنت بتنفذها زي:
- المرونة مع التغييرات المستمرة في المواصفات ميزة، ولكنها برضو تعتبر تحدي؛ لأن بسهولة النظام ممكن يكون غير متناسق وتظهر فيه مشاكل وتستهلك وقت أكبر للتعامل معها
- مُنحني التعلم للطريقة دي أصعب شوية لأنه بيحتاج اجتماعات وأدوار معينة الفريق ممكن ياخد وقت على ما يتعلمها ويستفاد منها
- الطريقة دي الأولوية فيها التواصل الفعلي بين الفريق عن التوثيق، وده ممكن يعمل نقص في توثيق عملية الإنتاج وبالتالي بيكون عندنا برنامج بعملية توثيق جودتها ضعيفة.
الـAgile فكرة مُتبناه من أغلبية فرق صناعة البرمجيات وليها طرق تنفيذ مختلفة زي Scrum و Kanban، بس هي مش “حل سحري” يمشي مع كل المشاريع. في حالات زي المشاريع متناهية الصغر، تَبني الطريقة دي فيها ممكن يكون تضييع للوقت والجهد.
