Networks 101 - Network Topologies

المقدمة

في المقال اللي فات، اتكلمنا عن مكونات الشبكة، النهاردة هنتكلم عن الأنواع المختلفة للشبكات (Network Types) ونتعرف على التصميمات (Topologies) اللي بتحدد إزاي الأجهزة بتتواصل مع بعضها.

Network Topologies

1- شبكة محلية (LAN - Local Area Network)

الـ LAN هي اختصار لكلمة Local Area Network، ودي عبارة عن شبكة تربط مجموعة من الأجهزة في مكان واحد زي مكتب ومدرسة. شبكة LAN بتتميز انها سريعة وآمنة لأنها تغطي مساحة صغيرة ومحددة، زي شبكة الإنترنت في بيتك أو شركتك اللي بتوصلك بكل الأجهزة اللي حواليك.

2- شبكة واسعة (WAN - Wide Area Network)

الـ WAN بقى هي الشبكة اللي بتغطي نطاقات جغرافية كبيرة، زي ربط مكاتب شركة موجودة في بلدين مختلفين. شبكة الـ WAN بتربط شبكات LAN ببعضها عشان توصل البيانات عبر مسافات كبيرة باستخدام تقنيات زي الـ VPN أو خدمات الإنترنت السريعة.

3- شبكة التخزين (SAN - Storage Area Networkسس

شبكة SAN متخصصة في تخزين وإدارة البيانات على سيرفرات محددة. الشركات الكبيرة بتستخدم SAN لتخزين كميات ضخمة من البيانات بشكل منظم وآمن. من مميزات الشبكة دي إنك تقدر تحدد صلاحيات معينة للوصول للبيانات، يعني مين يقدر يشوفها ومين يقدر يعدل عليها، وده بيوفر أمان أكتر للبيانات.

4- شبكة المدينة (MAN - Metropolitan Area Network)

شبكة الـ MAN بتربط شبكات في مناطق جغرافية متوسطة الحجم، زي ربط فروع شركة موجودة في مدينة أو أكثر بدون استخدام الإنترنت العام. تستخدم تكنولوجيا خاصة تربط بين شبكات LAN و WAN.

5- الشبكة اللاسلكية (WLAN - Wireless Local Area Network)

الشبكة دي مشهورة في الاستخدام اليومي، زي الراوتر اللي في البيت اللي بيبث الإنترنت لكل الأجهزة بشكل لاسلكي. الفرق بينها وبين شبكة LAN هو إن الـ WLAN بتستخدم إشارات لاسلكية لنقل البيانات بدلاً من الأسلاك.

تصميمات الشبكات (Network Topologies)

دلوقتي بعد ما عرفنا الأنواع، هنتكلم عن تصميمات الشبكات (Topologies)، اللي بتحدد طريقة توصيل الأجهزة ببعضها.

1- تصميم الـ Bus

التصميم ده بيكون كل الأجهزة متوصلة بكابل واحد رئيسي (Co-axial Cable). مميزاته إنه رخيص وسهل التوصيل، لكنه بيعاني من مشاكل زي حدوث التصادم (Collision) لما أكتر من جهاز يحاول يرسل بيانات في نفس الوقت، ولو الكابل اتقطع، الشبكة كلها بتتعطل.

2- تصميم الـ Star

في تصميم الـ Star، كل الأجهزة بتكون متوصلة بجهاز مركزي زي الـ Switch أو Hub. الفرق بين الـ Switch والـ Hub إن الـ Switch بيبعت البيانات للجهاز المطلوب بس، بينما الـ Hub بيبعت لكل الأجهزة المتصلة. ده بيخلي الـ Switch أكتر كفاءة وأسرع في نقل البيانات.

3- تصميم الـ Mesh

في التصميم ده، كل جهاز بيكون متصل بأجهزة تانية، وده بيضمن إنه لو في مشكلة في جهاز معين أو كابل، باقي الأجهزة تقدر تواصل التواصل مع بعض. التصميم ده مثالي في الشبكات اللي بتحتاج درجة عالية من الاعتمادية، لكن تكلفته أعلى.