في هذه الصفحة
المقدمة
حابب تعرف معلومات أكتر عن الشبكات (Network) حتى لو كل اللي تعرفه عنها مجرد اسمها بس؟ تابع المقال! هنتكلم فيه عن معلومات تخص الشبكات بشكل مبسط وسهل عشان تتعلم وتفهم أكتر عن التكنولوجيا اللي بتستخدمها كل يوم.
يعني إيه شبكة (Network)
الشبكة هي وسيلة لربط جهازين أو أكتر بهدف نقل البيانات أو مشاركتها. يعني لما تبعت لصديقك صورة أو ملف، الشبكة بتكون هي الوسيلة اللي بتنقل البيانات دي من جهازك لجهازه. بس الموضوع أكبر من كده! الشبكات بتدخل في حياتنا اليومية أكتر مما نتخيل، زي لما تفتح الإنترنت من موبايلك أو تشغل الطابعة اللي في المكتب من جهاز الكمبيوتر.
مكونات الشبكة
الشبكات بتتكون من 3 مكونات أساسية، وكل جزء له دور مهم في عملية نقل البيانات:
- الأجهزة النهائية (End Devices)الأجهزة النهائية هي الأجهزة اللي بنستخدمها بشكل مباشر، زي اللابتوب، الهواتف الذكية، الطابعات، وأجهزة الكمبيوتر الشخصية. دورها الأساسي إنها تستقبل البيانات أو ترسلها. مثال بسيط: لما موبايلك يستقبل صورة من صديقك، الموبايل بيشتغل كجهاز نهائي بيستقبل البيانات دي.
- أجهزة الشبكة (Network Devices)أجهزة الشبكة زي الـ Switch، Hub، Router، و Bridge بتلعب دور الوسيط اللي بينظم حركة البيانات بين الأجهزة النهائية. يعني لما اللابتوب يبعت ملف للطابعة عبر الشبكة، جهاز الـ Router مثلاً هو اللي بيوجه البيانات دي من اللابتوب للطابعة.
- Switch: بيوصل بين مجموعة من الأجهزة في نفس الشبكة المحلية.
- Router: بيوصل بين شبكات مختلفة وينظم حركة البيانات بينها.
- Hub: بيوزع البيانات المرسلة لكل الأجهزة في الشبكة لكنه أقل كفاءة من الـ Switch.
- وسائل الاتصال (Media)الوسيلة اللي بتوصل بين الأجهزة النهائية وأجهزة الشبكة ممكن تكون أسلاك (Wires) أو إشارات لاسلكية (Wireless). مثلاً، الأسلاك بتوصل جهاز الكمبيوتر بتاعك بالراوتر، بينما الإشارات اللاسلكية بتوصل موبايلك بنفس الراوتر بدون الحاجة لكابلات.
تقدروا دلوقتي تشتركوا في النشرة الأسبوعية لاقرأ-تِك بشكل مجاني تمامًا عشان يجيلكوا كل جديد بشكل أسبوعي فيما يخص مواضيع متنوعة وبشروحات بسيطة وسهلة وبجودة عالية 🚀
النشرة هيكون ليها شكل جديد ومختلف عن شكلها القديم وهنحاول انها تكون مميزة ومختلفة وخليط بين المحتوى الأساسي اللي بينزل ومفاجآت تانية كتير 🎉
Eqraatech - اقرأ-تِك
بفضل الله قمنا بإطلاق قناة اقرأ-تِك على التليجرام مجانًا للجميع 🚀
آملين بده اننا نفتح باب تاني لتحقيق رؤيتنا نحو إثراء المحتوى التقني باللغة العربية ، ومساعدة لكل متابعينا في انهم يوصلوا لجميع أخبار اقرأ-تِك من حيث المقالات ومحتوى ورقة وقلم والنشرة الأسبوعية وكل جديد بطريقة سريعة وسهلة
مستنينكوا تنورونا , وده رابط القناة 👇
أهمية الشبكات
الشبكات مش بس وسيلة لنقل البيانات، لكنها بقت جزء أساسي من حياتنا اليومية. في العمل، في البيت، وفي أماكن كتير، بنعتمد عليها لنقل المعلومات بسرعة وكفاءة. الشبكات بتساعدنا نوصل البيانات بسهولة بين الأجهزة، وتسمح للموظفين في الشركات يشتغلوا على نفس المشروع حتى لو مش في نفس المكان.
في الختام
كده نكون اتكلمنا النهاردة عن مفهوم الشبكات ومكوناتها. في المقال الجاي هنتكلم عن أنواع الشبكات المختلفة ومميزاتها واستخداماتها.
