المقدمة

المبرمجين ليهم علاقة غريبة بالـ VPN بنستخدمه بشكل يومي أو شبه يومي بس في نفس الوقت مش عارفين كل تفاصيله لأننا مش بتوع شبكات, النهارده هنتكلم عن أهم الحاجات اللي لازم أي مبرمج يعرفها عن الـ VPN: هو إيه، بيحل مشاكل إيه، بيشتغل إزاي، مميزاته وعيوبه، وإزاي تختار VPN مناسب من غير ما تقع في فخ التسويق .

ما هو ال VPN 

VPN اختصار لـ Virtual Private Network، وهو ببساطة طبقة وسيطة بتعمل نفق مشفّر (Encrypted Tunnel) بين جهازك وبين الإنترنت أو شبكة خاصة. 

دا هو التعريف الرسمي والموجود في الكتب كمل معانا ٣٠ ثانية كمان ونفهم يعني ايه. 

المشكلات التي يحلها ال VPN 

الـ VPN لم يظهر أساسًا عشان الخصوصية الشخصية أو فتح المواقع المحجوبة زي ما هو شائع اليوم، بل ظهر كحل تقني لمشكلة واضحة جدًا في بيئة الشركات.

ودا لأن كل شركة بيكون عندها Private Network عليه مواردها وأجهزتها ولما موظف يسافر أو يشتغل من فرع الشركة في مكان تاني مبيقدرش يوصل للشبكة الداخلية من خلال الإنترنت لأن دا اتصال غير آمن. عشان نحل المشكلة دي كان في حل Physical باننا نوصل سلك لجهاز الموظف دا أو بالفرع التاني "طبعًا حل غير منطقي" فالحل بدلً من السلك إننا نعمل Tunnel أو أنبوبة آمنة من خلال الانترنت بين جهاز الموظف والشبكة الداخلية للشركة نمرر فيها البيانات المهمة بتاعتنا ووقتها بيظهر جهاز الموظف كأنه جزء من شبكة الشركة ومن هنا جه الإسم Virtual Private Network 

How VPN Works?

 مع الوقت تطور ال VPN وإلي جانب ال Remote Private Network Access أصبحت استخداماته بتشمل:

  • أداة لزيادة خصوصية تصفحك علي الانترنت
    • ودا لأن ال Internet Service Provider (ISP) بتاعك بيقدر في الطبيعي يشوف المواقع اللي انت بتزورها وتقدر كمان ال Services اللي انت بتستخدمها تتبع موقعك الجغرافي, ال VPN بيحل المشكلة دي لأنه بيغير ال IP Address بتاعك وبيبان ال VPN Server IP و بالتالي بيكون تتبعك أصعب و ال ISP لا يزال بيشوف مقدار الترافيك اللي بتستخدمه ولكن ميقدرش يعرف تفاصيل أكثر من كدا. 
  • فتح Services مقفولة جغرافيًا

- معظم دول العالم بتفرض قيود على المحتوى اللي تقدر توصله وأنت بداخل البلد فمثلاً متقدرش تفتح Youtube في الصين من غير VPN. ال VPN بيحل المشكلة دي لأنه زي ما قولنا ال ISP مش عارف أصلاً أنت بتزور مواقع ايه وبالتالي ميقدرش يحجب موقع هو مش عارفه. 

- كمنا Payment Services كتير بتكون محدودة جغرافيًا كوسيلة حماية للخدمات دي من ال International Hacking فلو أنت مبرمج ومحتاج تختبر Integration مع خدمة دفع في بلد تانية فالـ VPN بيديك حرية تختبر الخدمة/المنتج من أكتر من Location.

  • الأمان على الشبكات العامة 
    • لو شغال في كافيه أو Co-working Space أو في فندق مثلاً علي Public WIFI فبتكون عرضة لهجمات زي Packet Sniffingو Man-in-the-Middle Attacks وعشان كدا ضروري تستخدم VPN خصوصًا لو بتستخدم Credentials/Tokens/SSH 

المميزات 

  • تشفير الاتصال، كل ال Traffic بتاعك مع استخدام VPN بيكون Encrypted فلو أنت بتستخدم موقع HTTP و لا يدعم HTTPS فاستعمال VPN خطوة لا غنى عنها.
  • إخفاء الـ IP الحقيقي
  • الوصول إلى الشبكات المغلقة Private Networks زي سيرفرات الشركة وغيرها
  • مرونة في اختبار وتطوير البرامج المختلفة
  • تقليل المخاطر وقت استخدام الشبكات العامة

العيوب 

  • انخفاض السرعة، دا لأن ال Latencey بتكون أعلى وال Bandwidth أقل, ودا لأن ال VPN بيعمل Wrapping لكل ال Packets ب Headers إضافية وبيشفرها.
  • الاعتماد على طرف ثالث، وقت ما تعتمد على ال VPN Provider فأنت كل ال Traffic بتاعك بيعدي من على سيرفراته وبالتالي ممكن يحتفظ بـ Logs فبلاش الثقة المطلقة في ال VPN ولازم ندور كويس ورا ال VPN Services اللي بنستخدمها.
  • ال VPN مش سحر، فحتي لو مشغل ال VPN وفتحنا Phishing Email فال VPN مش بيمنع ال Malware ولا هيحمي بياناتك إنها تتسرق.

البروتوكولات المستخدمة لتطبيق الـ VPN

اختيار البروتوكول اللي بنستخدمه لتنفيذ ال VPN نقطة هامة لأن البروتوكول هو اللي بيحدد الأمان، السرعة، والاستقرار. البروتوكلات كلها بتشترك في مسؤليتها إنها تشفر البيانات وتبعتها لل VPN Server وتقوم بفك تشفير البيانات اللي بتستلمها وكمان بتدير عميلة فتح وغلق ال Tunnel من جهازك لل VPN Server.

1. OpenVPN

  • Open Source
  • بيستخدم SSL/TLS
  • قوي وآمن جدًا
  • بطيء نسبيًا

مناسب لـ:

  • الاستخدامات الحساسة
  • الشركات

2. IPSec / IKEv2

  • سريع ومستقر
  • ممتاز للموبايل (بيتعامل كويس مع تغيير الشبكات)
  • معقد في الإعداد

مناسب لـ:

  • Enterprise VPNs
  • Mobile developers

3. WireGuard

  • حديث نسبيًا
  • Codebase صغير جدًا
  • أداء عالي
  • تشفير قوي

كمبرمجين، ده غالبًا أفضل اختيار حاليًا من حيث:

Performance + Simplicity

4. PPTP (غير مُفضل)

  • قديم
  • سريع
  • أمانه ضعيف

فيفضل تجنبه تمامًا.

أهم معايير اختيار الـ VPN 

1. البروتوكول

  • الأفضل: WireGuard أو OpenVPN
  • ابعد عن أي Provider مش واضح في النقطة دي

2. سياسة الـ Logs

اسأل نفسك: هل الشركة بتسجل الTraffic بتاعي ولا لأ؟

يفضل:

  • No-Logs Policy
  • شفافية قانونية

3. الأداء والاستقرار

  • Latency الأهم من Speed أحيانًا
  • Stability أهم من عدد السيرفرات

4. سهولة الاستخدام والتخصيص

  • CLI Support
  • Configuration files واضحة
  • دعم Linux كويس

في الختام

بالنهاية استخدام ال VPN أساسي للشركات و اختياري للأفراد ولكنه بيضمنلك أمان ومميزات كتيرة في شغلك كمبرمج بل ينفع تعمله Setup علي الراوتر الخاص بيك بحيث تكون كل أجهزتك محمية طبعًا في مقابل تقليل بسيط في السرعة, شاركونا بتستخدموا أي VPN Providers وليه اختارتوه و شاركونا حابين الفترة الجاية نتكلم عن إيه، دٌمتم سالمين.👋

المصادر

https://nordvpn.com/blog/how-does-a-vpn-work/