مقدمة

كمطور، شغلك مش مجرد إنك تكتب كود وتنفذ الـ Feature المطلوبة. نجاحك الحقيقي بيجي لما تفهم الصورة الكبيرة ورا كل Feature: ليه اتطلبت؟ مين هيستخدمها؟ وإزاي هتأثر على المنتج ككل؟ لما تعرف الإجابات دي، هتلاقي نفسك بتاخد قرارات أذكى وتساهم بشكل مباشر في نجاح المنتج.

 خلينا نتكلم عن الفكرة دي من زوايا مختلفة مع أمثلة حقيقية.

 الهدف مش مجرد أضافة  "Feature"، الهدف هو حل مشكلة.

كتير كمطورين بيشوف الـ Feature  كحاجة مطلوب تنفيذها وخلاص. لكن الحقيقة، كل Feature وراها مشكلة بتواجه المستخدم أو فرصة لتحسين تجربته. لما تفكر في الـ Feature على إنها حل لمشكلة مش مجرد حاجة هتنضاف، هتلاقي نفسك بتاخد قرارات تقنية أذكى، وتقدر تقدم حلول مبتكرة تساهم في تحسين المنتج.

إزاي تفكر بالشكل ده؟

1. ابدأ بالسؤال: ليه الميزة دي مطلوبة؟ إيه المشكلة اللي بتعالجها؟
2. افهم التأثير: لما تبني الميزة، إيه التغيير اللي هيحصل على تجربة المستخدم أو المنتج؟
3. فكر في الحلول: هل الحل المطلوب هو أفضل طريقة لحل المشكلة؟ ولا ممكن تقدم طريقة أبسط وأكتر فاعلية؟

مثال واقعي: 

Spotify Discover Weekly Feature

المشكلة:  المستخدمين كانوا عايزين يلاقوا أغاني جديدة تناسب ذوقهم، بس عملية البحث اليدوي كانت مملة وتستغرق وقت طويل.الحل: فريق Spotify قرر يبني ميزة Discover Weekly  بدل ما تكون مجرد قائمة عشوائية من الأغاني، اعتمدوا على خوارزمية بتحلل سلوك المستخدمين:

• الأغاني اللي بيكررها.
• القوائم اللي بيعملها.
• التفضيلات الموسيقية العامة.

النتيجة:  المستخدمين بدأوا يعتمدوا على الميزة أسبوعيًا، وزادت معدلات التفاعل بشكل ملحوظ. Spotify ما اكتفتش إنها تقدم ميزة جديدة، لكنها حلت مشكلة البحث عن الأغاني بطريقة مبتكرة.

الصورة الكبيرة بتخليك توازن بين الأولويات التقنية والعملية

كمطور، كتير بتلاقي نفسك في حيرة بين تقديم حل تقني مثالي أو اختيار طريق أسرع للوصول للهدف. هنا بيجي دور "الصورة الكبيرة" في تحديد أولوياتك. لما تفهم الهدف الحقيقي للـFeature  وتأثيرها على المستخدم والمنتج، هتعرف توازن بين الحلول التقنية الأفضل والوقت المطلوب لظهورها في المنتج.

التوازن ده مهم لأن:

• الحل المثالي ممكن ياخد وقت طويل جدًا يتعارض مع مواعيد التسليم.
• الحل السريع ممكن ما يكونش بالجودة المطلوبة لو الهدف طويل المدى.

الصورة الكبيرة بتديك القدرة على فهم الأولويات:

• هل الأهم إن الميزة تطلع بسرعة؟
• ولا إن الجودة العالية هي الأساس عشان تحل مشكلة كبيرة للمستخدم؟

مثال واقعي 1

 Netflix Autoplay Feature

المشكلة: المستخدمين كانوا بيخرجوا من التطبيق بعد نهاية الحلقة، وده كان بيأثر على معدلات التفاعل.

الصورة الكبيرة:الهدف الأساسي كان زيادة وقت المشاهدة لكل مستخدم، وبالتالي تعزيز ولائهم للمنصة.

التحدي:

• لو تم بناء نظام معقد لتشغيل الحلقات تلقائيًا بناءً على سلوك المستخدم، كان هيحتاج وقت تطوير طويل.
• لو تم اعتماد حل بسيط زي تشغيل الحلقة الجاية مباشرةً من غير تحليل متقدم، الميزة هتكون جاهزة أسرع.

الحل: الفريق قرر يبدأ بحل بسيط (Autoplay) يشغل الحلقة التالية تلقائيًا، وبعد إطلاق الميزة وتفاعل المستخدمين، بدأوا يضيفوا تحسينات تدريجية بناءً على البيانات.

النتيجة:

• الميزة تم إطلاقها بسرعة.
• زادت معدلات المشاهدة.
• وتم تحسين النظام بمرور الوقت.

مثال واقعي 2

 Spotify Offline Mode Feature

المشكلة: المستخدمين كانوا عايزين يسمعوا الموسيقى بدون إنترنت، ودي كانت Feature أساسية للتطبيق في بعض الأسواق.

الصورة الكبيرة:الهدف كان تمكين المستخدمين من الوصول للموسيقى بدون تعقيد أو تأخير، لكن الفريق كان محتاج يطلع Feature  في أسرع وقت.

التحدي:

• بناء نظام تخزين متكامل لكل ملفات الموسيقى كان هيحتاج وقت كبير ومجهود ضخم.
• البحث عن حل سريع ومؤقت كان ممكن يساعد في تلبية احتياجات السوق.

الحل:الفريق اعتمد على التخزين المؤقت (Caching) ، بحيث يتم تخزين الملفات التي بالفعل استمع إليها المستخدم مؤخرًا بشكل تلقائي من غير ما نبني نظام معقد.

النتيجة:

• الFeature اشتغلت بشكل سريع وسلس.
•  هنلاقي أن Spotify كسبت قاعدة مستخدمين أكبر في الأسواق اللي الإنترنت فيها ضعيف.

في الختام

فهمك للصورة الكبيرة مش مجرد "إضافة معرفة"، لكنه مهارة أساسية بتخليك مطور أذكى وأكتر تأثيرًا. قبل ما تبدأ شغلك، اسأل نفسك:

• إيه المشكلة اللي بحاول أحلها؟
• إيه الطريقة الأفضل لتحقيق الهدف ده؟
• هل في طريقة أبسط أو أسرع؟

لما تكون فاهم الإجابات دي، شغلك مش بس هيكون أسرع، لكنه كمان هيضيف قيمة أكبر للمنتج وليك

المصادر

Five Years Of Discover Weekly | Spotify Advertising

Spotify AdvertisingSpotify Advertising TeamShare This

Spotify now automatically creates an offline playlist when you lose internet

Don’t lose your music when you lose your connection.

The Verge