طبعًا مش هنقول إنها اختصار لـ “واجهة التطبيقات البرمجية” لأنك غالبًا هتنسي الاسم علطول, ولكن هنفهم دورها ايه و بنستخدمها ليه بمثال بسيط ودا عمرك ما هتنساه الـ APIs بتلعب دور الجرسون في المطعم, هي ببساطة طريقة محددة لطلب شيء من المطبخ “السيرفر في حالتنا”, الجرسون بياخد طلبك يوصله للشيف اللي هيقوم بتجهيزه وبعد ما يجهز الجرسون يجمعه و يقدمهولك.
طريقة عمل الـ API
بياخد ال Request من ال Client يوصله لل Server اللي بيجهز الطلب ويقوم ال API بإرجاعه ك Response.
ليه مبيطلبش من الـ Server Direct ؟
لأكثر من سبب:
- السيرفر هيكون مشغول بتجهيز طلبك وطلب الزبائن التانين للمطعم فميقدرش يقوم بالمهمتين
- الـ API هيوصل طلبك بالطريقة المناسبة اللي يفهمها السيرفر, ودي نقطة مهمة لأن الكمبيوترز مبتفهمش غير طريقة واحدة مٌبرمجة عليها أي تغيير في الطريقة دي هيقولك لا والله معرفش دا بيتعمل ازاي وينتج عنه Request Failure فالـ API بيخلي كل الناس تكلم السيرفر بطريقة رسمية ومٌوحدة- وبسيطة- يقدر السيرفر يتعامل معها
التعامل السهل مع ال APIs خلاها من أكثر الطرق الشائعة للدمج بين أكثر من سيستم, فلو عاوز تستفاد بكل مميزات سيستم معين زي ChatGPT مثلاً من غير ما تضطر تبنيه من الصفر, كل اللي عليك تقرأ ال API Documents بتاعته وتقدر توظفه بسهولة في التطبيق أو البرنامج اللي بتبرمجه. بل وقدمت ميزة كمان , إنه لو في شركة بتبني سيستم معين وعاوزه الناس تستخدمه من غير ما يعرفوا هو بيشتغل ازاي سواء حفاظًا على أمن السيستم من أي تغيير أو هجوم أو إن محدش يقلده أو يسرقه, فهتظهر ال API والناس تستفيد منه ومن غير ما المستخدم يعرف سر الوصفة.
ازاي اقدر استخدمها ؟
الـ APIs ليها أنواع كتير من حيث تصميم طلبها للموارد أو طريقة التواصل و الأكثر استخدامًا حالياً هو ال REST ولكن الأنواع التانية مهمة كذلك ولها حالات أنسب للاستخدام زي:
- الـ WebHooks
- الـ GraphQL
- الـ gRPC
- الـ SOAP
كل نوع ليه طريقة عمل معينة نقدر نتكلم عنها في ورقات منفصلة وكلهم مبنيين على أفكار بسيطة جدًا, بعدها بتختار النوع المناسب للمشروع بتاعك وتتعلم استخدامه ,و وجود تشابهات بين كل نوع والتاني زي ال Message Format اللي بتكتبها بتكون JSON or XML في اغلب الانواع بيخلي رحلة التعلم سريعة وممتعة.
